САМҒА, ІНІШЕК

Самға жастық от барда,

Жолың болсын жортқанда.

Дүниеде жүйрік көп,

Жалғыз екем деп қалма.

Айдарыңнан жел ессін,

Ағайынмен кеңескін.

Қарайлай жүр артыңа,

Артық айтты демессің.

Әке-шеше — алтының,

Қадірлей біл, жарқыным.

Сүйеу болар бауырың

Сыздағанда балтырың.

Сыйла жолдас-жораңды,

Болма жалғыз тораңғы.

Дос, сырласы жоқтардың

Алды тастай қараңғы.

Бола білгін бауырмал,

Сақтана біл жауыңнан.

Намысыңды жыртатын,

Артыңда үлкен қауым бар!